मराठी तितुका मेळविण्याची अहोरात्र चळवळ
परदेशातील कुटुंब अपुले महाराष्ट्र मंडळ,
बृहन्महाराष्ट्र मंडळ IIधृII

जमुनी रमती उत्तररंगी नागरिक ज्येष्ठ
मुलांस शिकवू मायबोली जी सुधेहून श्रेष्ठ
आरोग्याचा सल्ला मिळतो जैसे गंगाजळ II१II

नृत्य नाट्य संगीत कलांचा सुंदर आविष्कार
देशी-विदेशी कलाकार ते करती त्यां साकार
मनापासूनी करती कौतुक प्रेक्षक चोखंदळ II२II

उद्योगाची मिळे प्रेरणा, अर्थाचे मंथन
रेशीमगाठी कुणी बांधती मनास मिळता मन
ध्यानधारणा, पूजा शमविती मनातला गोंधळ II३II

अज्ञाताचा शोध घेतसे ज्योतिष, तत्त्वज्ञान
लक्ष्यवेध करण्यास सज्ज हो सैन्यातील जवान
मायदेशीही मदत पाठवी भरभरूनी ओंजळ II४II

युवा पिढीला देऊ वारसा होवो संस्कारी
वृत्तासंगे जाई वार्ता दिशांतून चारी
करू उन्नती सगळे मिळुनी हीच एक तळमळ II५II