मनुष्यजन्मप्राप्तीनंतर जीवनाच्या सर्वोच्च विकासासाठी, विवेकाच्या माध्यमातून आत्मानंदाची प्राप्ती. हिंदू धर्माने प्रस्थापित केलेले मानवी जीवनाचे चार स्तंभ धर्म, अर्थ, काम व मोक्ष. धर्माचे पालन करीत, अर्थ व कामाने जीवन समृद्ध करीत, अंतिमतः मोक्ष प्राप्ती. अध्यात्मशास्त्र व जीवन ह्यांचे हेतू जर परस्परपूरक असतील तर मानवी जीवनाच्या साफल्यासाठी अध्यात्मशास्त्राचा उपयोग झाला पाहिजे. अध्यात्मशास्त्राची प्रयोगशाळा म्हणजे मानवी जीवन व मानवी जीवनाच्या अंतिम ध्येयासाठी अध्यात्मशास्त्र अशी ती परस्परपूरकता आहे.

उपक्रमाचे ब्रीदवाक्य: शाश्वत आनंदाचा धर्म..!

उत्तर अमेरिकेतील मराठी समाजासाठी बृहन्महाराष्ट्र मंडळ हे केवळ एक सांस्कृतिक व्यासपीठ नसून, आपल्या बौद्धिक आणि अध्यात्मिक परंपरेच्या संवर्धनासाठी झपाटून कार्य करणारी संस्था आहे. 'तत्वज्ञान उपक्रम' ही त्या कार्याची एक महत्त्वपूर्ण दिशा असून, वैदिक विचारसरणी, भारतीय इतिहास व अध्यात्म यांच्या विषयी ज्ञानोत्सुक; जिज्ञासा असणाऱ्या समाजासाठी हा बृहन्महाराष्ट्र मंडळ तत्वज्ञान उपक्रम राबवला जातो. वेळोवेळी कार्यकारी समिती सद्गुरू परमपूज्य श्री. मंगेशदादा फडके यांचे मार्गदर्शन घेते. विविध अध्यात्मिक प्रवचनमाला, शास्त्र व विज्ञान, तसेच इतिहास व्याख्यानमाला अशा माध्यमातून माहिती व मार्गदर्शन केले जाते. परम पूज्य श्री. मंगेशदादांचे प्रवचन दौऱ्यातून स्थानिक साधकांना मार्गदर्शही केले जाते. दौऱ्यांच्या दरम्यान मिळालेल्या प्रतिसादात्मक सूचनांतून अध्यात्मिक शिबिरांचे आयोजन केले जावे अशी मागणी आलेली असल्याने. अश्या शिबिरांचे आयोजनहि तत्वज्ञान उपक्रम करण्याचे योजत आहे. या कार्यामागे एकच हेतू आहे. आपल्या संस्कृतीतील चिंतनपरंपरेचा साक्षेपाने अभ्यास करून, ती पुढच्या पिढ्यांपर्यंत पोहोचवणे आणि त्यातून आत्मिक समृद्धीचा मार्ग शोधणे.